इटहरी ।  भर्खरै बढुवा भएका नेपाल प्रहरीका १७ जना डिआइजी (प्रहरी नायव महानिरीक्षक)हरुको पदस्थापन भएको छ । गृह मन्त्रालयको मन्त्रीस्तरीय निर्णयअनुसार जनपद प्रहरी समूहतर्फ बढुवा भएका डिआइजीहरुको पदस्थापन गरिएको हो ।

विभिन्न स्थानको जिम्मेवारीसहित डिआइजीहरुलाई पदस्थापन (सरुवा) गरिएको छ । प्रदेश १ प्रहरी प्रमुखका रूपमा डिआइजी सुदीप गिरीको सरुवा भएको छ । यसअघि अरुणकुमार बिसी प्रदेश प्रहरी प्रमुख थिए । उनी बढुवा भएर एआइजी बनेपछि प्रदेश १ मा डिआइजी खाली थियो । 

बढुवाको पहिलो नम्बरमा परेका बसन्तबहादुर कुँवरको प्रहरी प्रधान कार्यालय कार्य विभाग नक्साल, दोस्रोमा रहेका टेकप्रसाद राईको  प्रहरी प्रधान कार्यालय प्रहरी महानिरीक्षकको सचिवालय नक्साल, तेस्रोमा रहेका अशोक सिंहको प्रहरी प्रधान कार्यालय विशेष व्युरो नक्सालमा सरुवा भएको छ। 

त्यसैगरी कार्यरत भीमप्रसाद ढकालको प्रहरी प्रधान कार्यालय अन्वेषण योजना तथा निर्देशनालय नक्सालमा सरुवा भएको छ। बढुवाको अन्तिम अर्थात १७ नम्बरमा परेका किरण राणाको काठमाडौं उपत्यका प्रहरी कार्यालय रानीपोखरीमा सरुवा गरिएको छ ।