झापा / झापाको मेचीनगर-४ का वडाअध्यक्षले आफ्नो कार्यकाल (५ वर्षभित्र) १ लाख विरुवा हुर्काउने लक्ष्य लिएको बताएका छन् ।मेचीनगर नगरपालिका वडा नम्बर ४ ले पाँच वर्षभित्र एक लाख विरुवा हुर्काउने लक्ष्यसहित वृक्षारोपण सुरु गरेको छ ।

आइतबार विश्व वातावरण दिवसको अवसर पारेर सो वडामा २ हजार विभिन्न प्रजातिका विरुवाको वृक्षारोपण गरियो । उक्त अवसरमा वडाध्यक्ष अर्जुनकुमार कार्कीले एक लाख विरुवा हुर्काउने लक्ष्यसहित वृक्षारोपण सुरु गरेको घोषणा गरे ।

कार्यक्रममा बिना कुर्सी बनाइएको मञ्चमा बसेका अतिथिहरुलाई पीराको व्यवस्था गरिएको थियो । कार्यक्रम स्थलमा स्थानीय लोप हुन लागेको ग्रामीण क्षेत्रमा पाइने घरेलु परिकार, परम्परागत भेषाभुषा, मेचीनगरमा पाइने विभिन्न प्रजातिका चरा, हात्तीबाट पीडित जनताको वास्तवीक चित्रण गरिएका तस्वीरहरु, चित्रकला लगायतका स्टलहरु राखिएको थियो ।