इटहरीः सुनसरीको इटहरी उपमहानगरपालिकामा हिजो सम्पन्न स्थानीय तह निर्वाचनको मतगणना जारी छ ।

हालसम्म वडा नम्बर २० को २०० मत गणना भएको निर्वाचन कार्यालय इटहरीले जनाएको छ । पछिल्लो मतपरिणामअनुसार सो वडामा मेयर पदमा बाम लोकतान्त्रिक संयुक्त गठबन्धनका तर्फबाट उम्मेदवार बनेका नेपाली कांग्रेसका नगर सभापति हेमकर्ण पौडेलले एक ६ मतका साथ अग्रता कायम राखेका छन् । उनका निकटतम प्रतिद्वन्द्वी नेकपा एमालेका नगर अध्यक्षसमेत रहेका यामकुमार सुब्बा ६२ मतका साथ सो वडामा पौडेललाई पछ्याइरहेका छन् ।

१२ मतका साथ राष्ट्रिय प्रजातन्त्र पार्टीका उम्मेदवार आकाश सुब्बा तेस्रो स्थानमा रहेका छन् । यसैगरी, उपमेयरतर्फ एमाले उम्मेदवार सङ्गीता चौधरी ६५ मतका साथ अग्रस्थानमा रहेकी छन् । उनका निकटतम प्रतिद्वन्द्वी गठबन्धनका तर्फबाट उपमेयरको उम्मेदवार बनेका नेकपा एकीकृत समाजवादीका केन्द्रीय सदस्य केशवकुमार बिष्ट ६१ मतका साथ चौधरीलाई पछ्याइरहेका छन् । केही स्वतन्त्र उम्मेदवारहरुसहित इटहरीको मेयर पदमा कुल १६ जना आकांक्षीहरु प्रतिस्पर्धामा रहेका छन् ।

हिजो सम्पन्न मतदानमा इटहरीका २० वटै वडाका जम्मा एक लाख चार हजार ६ सय २६ मतदातामध्ये ७३ हजार सात सय ३२ जनाले मतदान गरेका थिए । यो संख्या कुल मतदाता संख्याको ७०.४७ प्रतिशत हो । अर्थात् इटहरी उपमहानगरमा ७०.४७ प्रतिशत मत खसेको छ । २० नम्बर वडामा जम्मा सात हजार नौ सय ७४ मतदाता रहेकोमा चार हजार नौ सय १६ जनाले मतदान गरेका छन् । अर्थात् २० नम्बर वडामा जम्मा ६१.६५ प्रतिशत मत खसेको छ ।