इटहरीः मतदातालाई पैसा बाँडेको आरोपमा पक्राउ परेका सिरहाको ओरही गाउँपालिकाका अध्यक्ष उम्मेदवार सिद्धार्थ यादवलाई प्रहरीले तत्कालका लागि छाडेको छ ।

यादवलाई भोलि हाजिर हुने सर्तमा आज निर्वाचन प्रयोजनका लागि छोडिएको प्रहरीले जनाएको छ ।

उजुरी आएपछि उनीउपर थप कारबाही प्रक्रिया अघि बढाइनेछ ।

मध्यराति कांग्रेस र माओवादी कार्यकर्ताबीच झडपको क्रममा उनलाई प्रहरीले पक्राउ गरेको हो ।

उनी निवर्तमान गाउँपालिका अध्यक्ष समेत हुन् ।

औरही गाउँपालिका वडा नम्बर ४ स्थित मतदातालाई पैसा बाँड्न आएको भन्दै अध्यक्षका उम्मेदवार यादवलाई कांग्रेस र जसपाका कार्यकर्ताले घेराउ गरेका थिए । त्यसै क्रममा दुईतर्फी झडप हुँदा रड प्रहारबाट माओवादी कार्यकर्ता घाइते भएको सिरहाका डिएसपी सुवास बुढाथोकीले जानकारी दिए ।

कुटाकुट भएपछि उम्मेदवार यादवसहित थप दुई जनालाई नियन्त्रणमा लिइएको उनले बताए ।

झडपमा परी घाइते हुनेको नाम भने खुल्न सकेको छैन । ती युवकको टाउको फुटेपछि सिरहाकै अस्पतालमा उपचार भइरहेको छ ।