इटहरीः मोरङको मिक्लाजुङमा गएराति शक्तिशाली विष्फोट भएको छ भने आज बिहान पनि शंकास्पद वस्तु फेला परेको छ ।

स्थानीय तह निर्वाचन विथोल्न खोज्ने र निर्वाचन विरोधी समूहले विष्फोट गराएको हुन सक्ने प्रहरीले जनाएको छ । विष्फोट गराइएको स्थान यकिन हुन सकिरहेको छैन । तर मिक्लाजुङ गाउँपालिका–१ बर्खेमा आज (बिहीबार) बिहान बमजस्तो देखिने शङ्कास्पद वस्तु फेला परेको छ ।

विष्फोट गराइएको र शङ्कास्पद वस्तु भेटिएको स्थान आसपासमै रहेको हुनसक्ने स्थानीयले बताए । विष्फोट गराएको भोलिपल्ट बमजस्तो देखिने शङ्कास्पद वस्तु भेटिएपछि स्थानीय त्रसित एवम् आतङ्कित भएका छन् ।

मिक्लाजुङ–१ को सरस्वती आधारभूत विद्यालयका शिक्षक मदन श्रेष्ठले राति ११ देखि १२ बजेको बीचमा विष्फोटको ठुलो आवाज आएको जानकारी दिए । बम बनाएर छाडेजस्तो देखिने प्रेसर कुकर सोही विद्यालयबाट ५० मिटरजति टाढा सडकमा भेटिएको मोरङ प्रहरीका प्रवक्ता डिएसपी दीपक श्रेष्ठले बताए । उनका अनुसार खतरा भनेर लेखिएको र तारहरु बाहिर निकालेर सडकमा छाडिएको अवस्थामा प्रेसर कुकर फेला परेको हो ।

शङ्कास्पद वस्तु भेटिएको जानकारी आउनसाथ नेपाली सेनाको बम डिस्पोजल टोलीलाई खबर गरेर प्रहरीले घटनास्थलाई सुरक्षित राखेको श्रेष्ठले बताए ।