इटहरीः सुनसरीमा नेकपा एमालेको चुनाव प्रचारप्रसारबाट घर फर्किने क्रममा दुर्घटना हुँदा एक किशोरको मृत्यु भएको छ ।

स्थानीय तह निर्वाचनको प्रचार गरेर फर्कने क्रममा सुनसरीको भोक्राहानरसिंह गाउँपालिका ५ मा ट्याक्टरबाट लडेर सोमबार साँझ किशोरको मृत्यु भएको हो ।

पूर्वबाट पश्चिमतर्फ जाँदै गरेको को ३ त ६३ नम्बरको ट्याक्टरबाट खसेर भोक्राहानरसिंह ८ का १७ वर्षीय तप्रेज मियाँको मृत्यु भएको पूर्व क्षेत्रीय ट्राफिक प्रहरी कार्यालय इटहरीका प्रमुख (एसपी) बासुदेव खतिवडाले जानकारी दिए ।

उनका अनुसार ट्याक्टरबाट लगेर गम्भीर घाइते भएका मियाँको उपचारका क्रममा जिल्ला अस्पताल इनरुवामा साँझ ५ः४५ बजेतिर मृत्य भएको हो ।

मियाँ नेकपा एमालेको चुनावी प्रचार र घरदैलो कार्यक्रममा गएका थिए । घर फर्किने क्रममा ट्याक्टरबाट खस्नसाथ उनलाई पछाडिको चक्काले किचेको प्रारम्भिक अनुसन्धानबाट खुलेको छ ।

दुर्घटनालगत्तै ट्याक्टर चालक २२ वर्षीय मुन्ना भनिने अवास अन्सारी फरार भएका छन् । फरार रहेका उनको खोजी भइरहेको प्रहरीले जनाएको छ । घटनाबारे थप अनुसन्धान भइरहेको प्रहरीले जनाएको छ ।