इटहरीः वैशाख ३० गते हुन गइरहेको स्थानीय तह निर्वाचनको मौन अवधिसँगै भारतसँग सीमा जोडिएका जिल्लाहरुका सीमानाका ७२ घण्टाका लागि बन्द गरिने भएको छ । निर्वाचनको मौन अवधि आज मध्यराति १२ः०० बजेदेखि सुरु हुँदैछ ।

सीमावर्ती जिल्लाका सीमानाकाहरु पनि सम्बन्धित जिल्लाको जिल्ला प्रशासन कार्यालको आदेशमा सोही समयदेखि बन्द हुने भएको हो । नाका बन्द हुनेसम्बन्धी सूचना सम्बन्धित जिल्ला प्रशासन कार्यालयहरुले जारी गरिसकेका छन् । बाँके, बर्दिया, मोरङ, सुनसरी, झापा, सप्तरीलगायत भारतसँग जोडिएको सीमानाका आज रातिदेखि बन्द हुनेछन् । ७२ घण्टाको अवधिसम्म दुवै देशका सीमावर्ती क्षेत्रमा मदिराजन्य वस्तुको कारोबार तथा सेवनमा समेत प्रतिबन्ध लगाइएको छ ।