इटहरीः इटहरी उपमहानगरपालिका वडा नं. २० मा राप्रपाबाट वडाध्यक्षमा उम्मेदवारी दिएका दीपबहादुर पुरीले भ्रष्टाचारमुक्त वडा निर्माणका लागि आफूले उम्मेदवारी दिएको बताएका छन् ।

वडाको सामाजिक, आर्थिक, भौतिक लगायत सम्पूर्ण स्थिति देखिनेगरी डिजिटल प्रोफाइल बनाउने, वडाबासीको विकास प्रक्रियामा संलग्न हुन पाउने हक, र सूचनाको हकमा सम्मान, दलीय विभेद नगरी जनताको सेवा जस्ता कुरालाई आफ्नो संकल्प पत्रमा उल्लेख गरेका पुरीले अहिले राष्ट्रको मुद्वा कमजोर भएको बताए ।

उनले अहिले यस क्षेत्रका खोलानाला अव्यवस्थित रहेका कारण त्यसलाई निरुपण गर्नका लागि पनि आफ्नो उम्मेदवारी रहेको बताए ।

अहिले घरदैलो अभियानमा जनताले आफूलाई लोकप्रिय रूपमा चिन्दै आएको र मत हाल्ने विश्वास दिलाउँदै आएकाले चुनाव जित्ने उनको विश्वास छ ।

उनले संकल्पपत्रमा उल्लेख गरेअनुसार वडाबाट भएगरेका सबै कामको सूचनापाटीमा टाँस गरिनेछ । यस्तै, स्थानीय क्षेत्रमा शिक्षा, स्वास्थ्य, खानेपानी, सरसफाई लगायतका कुरामा पनि आफूले महत्पपूर्ण काम गर्ने उनले सुनाए ।

पुरीको प्यानलमा खुल्ला सदस्यमा नवराज कार्की, शरणबहादुर तामाङ, महिला सदस्यमा मनु पुरी र दलित महिला सदस्यमा कविता पाँंचकोटी चुनावी मैदानमा छन् ।