इटहरीः सुनसरीको कोसी गाउँपालिका–३ मा बसको ठक्करबाट शनिबार राति मोटरसाइकल चालकको मृत्यु भएको छ । मृतकको पहिचान खुल्न बाँकी छ ।

पूर्व–पश्चिम लोकमार्गअन्तर्गत पूर्वबाट पश्चिमतर्फ जाँदै गरेको ना ४ ख ६८४० नम्बरको बसले विपरीत दिशाबाट आउँदै गरेको को ५ प ४००४ नम्बरको मोटरसाइकललाई ठक्कर दिँदा राति १०ः३० बजेतिर दुर्घटना भएको हो । दुर्घटनामा पहिचान नखुलेका मोटरसाइकल चालक अन्दाजी २०÷२२ वर्षीय युवकको मृत्यु भएको प्रहरीले जनाएको छ ।

प्रहरीका अनुसार दुर्घटनामा परेर गम्भीर घाइते भएका उनको उपचारका क्रममा जिल्ला अस्पताल इनरुवामा मृत्यु भएको हो । दुर्घटनापछि बसका चालक फरार बनेका छन् ।

फरार रहेका चालकको खोजी तीव्र पारेर प्रहरीले घटनाको अनुसन्धान थालेको छ । बसको तीव्र गतिका कारण दुर्घटना भएको प्रहरीले जनाएको छ ।