इटहरीः सुनसरीको इटहरी उपमहानगरपालिका २० मा नेपाली कांग्रेस नेतृत्वको गठबन्धनले प्रचारप्रसार तिव्र पारेको छ । गठबन्धनका तर्फबाट मणिराम श्रेष्ठ वडाध्यक्ष पदका लागि चुनावी मैदानमा उत्रिएका छन् ।

उनलाई २०७४ सालको स्थानीय तह निर्वाचनमा नेकपा एमाले तर्फका प्रतिद्वन्द्वी उम्मेदवार रुद्र बस्नेतले पनि सहयोग गरिरहेका छन् । बस्नेत एमाले परित्याग गरी नेकपा एकीकृत समाजवादीमा प्रवेश गरेकाले उनी पनि गठबन्धनलाई जिताउन अग्रसर भएका हुन् । उनले मेयरमा रुख, उपमेयरमा कलम र इटहरी २० मा अरु उम्मेदवारलाई रुखमै मत मागिरहेका छन् । उनको प्यानलमा सबै नेपाली कांग्रेसकै उम्मेदवार छन् ।

जसअन्र्तगत खुल्ला महिला सदस्यमा धर्मा गिरी, दलित महिला सदस्यमा कुमारी बिक, खुल्ला सदस्यमा तनुज गुरुङ (सुरेश) र खुल्ला सदस्यमा बहादुर तामाङ चुनावी मैदानमा छन् । अहिले उनीहरू घरदैलो अभियानमा होमिएका छन् । कांग्रेसका वडा सभापति अर्जुन बस्नेतले आफूहरूले चुनाव जित्ने दाबी गरे । ‘अहिले हामी घरदैलोमा छौँ, चुनाव जित्ने निश्चित छ,’ उनले भने, ‘यसअघि निर्वाचनमा उठेका माओबादी केन्द्र, नेकपा एमालेबाट फुटेका नेताहरू पनि एकै भएका कारण सहजै चुनाव जितिन्छ भन्ने विश्वास छ ।’