इटहरीः आगामी वैशाख ३० गते हुन गइरहेको स्थानीय तह निर्वाचनमा सुनसरीको इटहरी उपमहानगरपालिकामा चार सय आठ जना उम्मेदवारहरु प्रतिस्पर्धामा उत्रिएका छन् । एक सय दुई पदका लागि प्रारम्भमा पाँच सय ४१ जनाको उम्मेदवारी परेकोमा एक सय ३३ जना उम्मेदवारले आफ्नो उम्मेदवारी फिर्ता लिएपछि चार सय ८ जना उम्मेदवारको अन्तिम नामावली निर्वाचन आयोगले प्रकाशन गरेको हो । कुल उम्मेदवारहरुमध्ये मेयरको प्रतिस्पर्धामा १६ जना र उपमेयरमा सात जना अन्तिम नतिजा नआएसम्म प्रतिस्पर्धामा रहने भएका छन् ।

नेकपा माओवादी केन्द्रले गठबन्धनलाई जिताउन पहल गर्ने भन्दै आफ्ना सबै उम्मेद्धवारी फिर्ता लिइसकेको छ भने नेकपा एकिकृत समाजवादीले पनि गठबन्धनमा सहमति भएबाहेका सबै उम्मेद्धवारी फिर्ता लिएको छ ।

२० वडाको वडाध्यक्ष पदमा उम्मेदवारी दिएका ३४ जना, खुल्ला वडा सदस्यमा उम्मेदवारी दिएका ४७ जना, महिला वडा सदस्यमा उम्मेदवारी दिएका २६ जना र दलित महिला सदस्य पदमा उम्मेदवारी दिएका २२ जनाले उम्मेदवारी फिर्ता लिएका छन् ।

इटहरीमा मेयर पदका लागि १८ जना, उपमेयर पदमा ९ जनाको उम्मेदवारी परेकोमा दुवै पदका दुई÷दुई जना आकांक्षीले उम्मेदवारी फिर्ता लिएसँगै अब मेयर पदमा १६ जना र उप–मेयर पदमा सात जना मात्र प्रतिस्पर्धामा उत्रने भएका हुन् । इटहरीको २० वटा वडाको लागि ८७ जनाले वडाध्यक्ष पदका लागि प्रतिस्पर्धा गर्ने भएका छन् । यस्तै ४० खुल्ला वडा सदस्यमा पदमा दुई सय ३ जनाको उम्मेदवारी परेको थियो । जसमध्ये ४७ जनाले उमेदवारी फिर्ता लिएका छन् ।

बाँकी एक सय ५६ जना चुनावी मैदानमा होमिएका छन् । महिला वडा सदस्य र दलित महिला वडा सदस्यमा क्रमशः एक सय १ जना र ८९ जनाको उम्मेदवारी परेको थियो । ती मध्ये महिला वडा सदस्यबाट २६ जना र दलित महिला सदस्यबाट २२ जनाले नाम फिर्ता लिएसँगै अब महिल वडा सदस्यमा ७५ जना र दलित महिला वडा सदस्यमा ६७ जनाबीच प्रतिस्पर्धा हुने भएको छ ।