सुनसरी , माेरङ र झापामा ट्रान्सफर्मर चोरीका घटना अत्याधिक : चोरी गर्ने र खरिद गर्ने सहित १२ जना पक्राउ

इटहरी । कोशी प्रदेशका तीन जिल्ला — झापा, मोरङ र सुनसरी — मा ट्रान्सफर्मर चोरीमा संलग्न समूहका १२ जना पक्राउ परेका छन्। प्रहरीले सात जना चोरीमा संलग्न र पाँच जना चोरीको सामान खरिद गर्ने व्यक्तिहरूलाई नियन्त्रणमा लिएको हो।

नेपाल विद्युत् प्राधिकरण कोशी प्रदेश कार्यालयको अनुरोधमा प्रहरीको विशेष टोलीले अनुसन्धान थालेको थियो। अनुसन्धानका क्रममा मोरङमा आठ, सुनसरीमा १२ र झापामा दुई स्थानका ट्रान्सफर्मर चोरी भएको पुष्टि भएको छ। चोरी गरिएका ट्रान्सफर्मरहरू मुख्यतः सिँचाइ प्रयोजनका लागि जडान गरिएका थिए।

पक्राउ परेका व्यक्ति

पक्राउ पर्नेहरूमा ट्रान्सफर्मर चोरीमा संलग्न आरोपमा:

• अर्जुनकुमार माझी (४२), ग्रामथान–४, मोरङ

• इरज धामी (३१), ग्रामथान–५, मोरङ

• अनुज विश्वास (३५), दुहबी–३, सुनसरी

• प्रयोगकुमार खाँ (३९), दुहबी–२, सुनसरी

• अर्जुन चौधरी (२६), बेलबारी–४, मोरङ

• रन्जित तामाङ (२७), बेलबारी–३, मोरङ

• आलम मिया (३४), भारत घर भई दुहबी–४ ससुरालीमा बसोबास

चोरी गरिएका ट्रान्सफर्मरबाट निकालिएको तामालगायत सामग्री खरिद गर्ने आरोपमा:

• लक्ष्य प्रधान (५३), विराटनगर–३

• कृष्णगोपाल ताम्रकार (६२), विराटनगर–६

• योगेश अग्रवाल (३२), दुहबी–३

• कपिल भट्ट (३१), दुहबी–२

• सीताराम राई (३९), इटहरी–४

बरामद सामग्री र अनुसन्धान

डिआइजी ईश्वर कार्कीका अनुसार, २२ वटा ट्रान्सफर्मर चोरी गरिएका थिए, जसको मूल्य करिब दुई करोड रुपैयाँ रहेको छ। प्रहरीको भनाइ अनुसार संलग्नहरू विद्युत् जडानको प्रविधिबारे जानकार थिए।

चोरीमा प्रयोग गरिएका उपकरणहरूमा डायल रेन्ज २२ थान, सलाई रेन्ज तीन थान, पिलास, पेचकस, छिनो, साङ्ली, कैँची, ह्याक्सो बिलेट लगायतका सामग्री बरामद भएका छन्। साथै, उनीहरूले प्रयोग गर्ने ६ वटा मोटरसाइकल पनि प्रहरीले नियन्त्रणमा लिएको छ।

तामाको तार निकालेर भाँडो छोड्ने शैली, स्थान छनोट गर्ने तरिका र चोरीको ढाँचा एउटै देखिएपछि प्रहरी यसलाई एउटै समूहको काम मानेर अनुसन्धानमा अघि बढेको थियो।

अनुसन्धानको पृष्ठभूमि

गत साउन ९ गते मोरङको रङ्गेली नगरपालिका–९ मा खानेपानी आयोजना अन्तर्गतको ट्रान्सफर्मर चोरीको प्रयास गर्ने क्रममा एक जना, अर्जुनकुमार थारू पक्राउ परेका थिए भने तीन जना फरार भएका थिए। त्यसपछि प्रहरीको संयुक्त टोली गठन गरी अनुसन्धान तीव्र पारिएको थियो।

डिआइजी कार्कीका अनुसार, ३५ जना सादा पोशाकधारी प्रहरी परिचालन गरी स्थानहरूमा निगरानी बढाइएको थियो, जसको परिणामस्वरूप २२ दिनको अवधिमा समूहमाथि कारबाही गर्न सफल भएको हो।