इटहरीमा त्रिनेत्र अध्यात्म चिन्तन केन्द्रकाे काेशी प्रदेश कार्यालय स्थापना

इटहरी ।  त्रिनेत्र अध्यात्म चिन्तन केन्द्र कोशी प्रदेशको आयोजनामा इटहरीमा चातुर्मास कथा पाठ परायणसहितको जीवनदर्शन ज्ञान सत्सङ्ग कार्यक्रम सञ्चालनमा आएको छ। बुधबार एक पत्रकार सम्मेलन गर्दै केन्द्रले आफ्ना आगामी योजना, उद्देश्य र हाल सञ्चालन भइरहेका कार्यक्रमहरूको जानकारी दिएको हो।

इटहरी उपमहानगरपालिका–२ स्थित सुकल्प सामुदायिक भवनमा रहेको कोशी प्रदेश कार्यालयमार्फत कार्यक्रमहरू सञ्चालन भइरहेका छन्। चातुर्मास कार्यक्रम हरिशयनी एकादशी (असार २२) देखि हरिबोधनी एकादशी (कात्तिक १५) सम्म सञ्चालन हुनेछ। यस अवधिमा धार्मिक ग्रन्थ पाठ, ध्यान, योग, सत्सङ्ग, सांस्कृतिक प्रस्तुति लगायतका दैनिक कार्यक्रमहरू गरिने जानकारी दिइएको छ।

 पत्रकार सम्मेलनमा बोल्दै कोशी प्रदेश अध्यक्ष सुभद्रा प्याकुरेलले संस्थाले वैदिक सनातन धर्मको संरक्षण तथा आध्यात्मिक चेतनाको प्रवर्द्धनमार्फत समाजमा आन्तरिक जागरण र सकारात्मक सोच विकास गर्ने उद्देश्य राखेको बताइन्। उनले देशका विभिन्न धार्मिक पर्यटकीयस्थलहरूमा १०८ शिवलिङ्ग निर्माण गरेर धार्मिक तथा सांस्कृतिक पर्यटन प्रवर्द्धन गर्ने योजना समेत सार्वजनिक गरिन्।

संस्थाका संरक्षक महेश्वरानन्द केशर पुरीले ‘त्रिनेत्र’ नामको आध्यात्मिक अर्थ स्पष्ट गर्दै शिवजीको तेस्रो नेत्र ज्ञान, आत्मजागरण र दृष्टिको प्रतीक भएको बताए। उनका अनुसार संस्था मानव चेतनाको नयाँ युगको सुरुवात गर्ने अभियानमा अग्रसर छ।

केन्द्रीय अध्यक्ष खिलहरी यात्रीले देशका चार प्रदेश—कोशी, बागमती, लुम्बिनी र कर्णालीमा कार्यालयहरू स्थापना भइसकेको र काठमाडौं, भक्तपुर, रामेछाप, दोलखा, नवलपरासी, रुपन्देही र सुनसरीजस्ता जिल्लाहरूमा गरी ६५ भन्दा बढी इकाइ सञ्चालनमा रहेको जानकारी दिए। हालसम्म केन्द्रमार्फत ४ हजारभन्दा बढी सदस्यता वितरण भइसकेको छ।

कार्यक्रममा बागमती प्रदेश अध्यक्ष पार्वती खड्का, इटहरी रेडक्रस उपशाखाका अध्यक्ष दिनेश भट्टराई, कोशी प्रदेश सांसद मिना कुमारी श्रेष्ठ लगायत जनप्रतिनिधि, सामाजिक अभियन्ता र पत्रकारहरूको सहभागिता रहेको थियो।

संस्थाले जात, धर्म वा लिङ्गका आधारमा कुनै भेदभाव नगरी समावेशी ढंगमा सनातन धर्मको प्रचार–प्रसार तथा सामाजिक चेतनाको अभिवृद्धिमा योगदान दिँदै आएको उल्लेख गरियो।