इटहरी । सुशिला कार्की नेतृत्वको अन्तरिम सरकारको सबैभन्दा सुनिने मन्त्री थिए, डा. महावीर पुन । शिक्षा, विज्ञान तथा प्रविधि मन्त्रालय सम्हालेका पुनले पत्रकारहरुलाई भनीरहन्थे, ‘टिपेर बनाइदिए भने फेरि मन्त्री बन्छु तर चुनाव त लड्दै लड्दिनँ ।’ तर डा. महावीर आफ्नो पूर्वमान्यता विरुद्ध उभिएर मंगलबार एकाएक म्याग्दी पुगे, उम्मेदवारी दर्ता गराए ।
महावीरले पहिलो नम्बरमा नै स्वतन्त्र उम्मेदवारको रूपमा उम्मेदवारी दर्ता गराएको जिल्ला निर्वाचन कार्यालय म्याग्दीका सहायक निर्वाचन अधिकृत जगत भण्डारीले बताए । वीरगन्ज कृषि औजार कारखाना पुनः स्थापित गर्ने उद्देश्य सहित राष्ट्रिय आविष्कार केन्द्रका संस्थापक तथा रोमन म्यागासेसे पुरस्कार विजेता महावीर आफ्नो जीवन गाथा ‘महावीर पुन : सम्झना, सपना र अविरल यात्रा’ पुस्तक सहित देश दौडाहामा थिए । त्यही बेला जेनजी विद्रोह भयो । किताब बेच्दाबेच्दै मन्त्री बन्नुपर्ने बाध्यता आइलाग्यो। मन्त्री बने ।
महावीरले सरकारी गाडी चढेनन् । काठमाडौंमा घर नभएका महावीरले क्वाटर खोजेनन् । सिंहदरबार र केशरमहलमा अफिसै बसे । कुनै विदेश भ्रमण गएनन् । आफू युनेस्कोको महासभाको उज्बेकिस्तानमा हुने साधारण सभा र ब्रिटिश काउन्सिलले नाइजेरियामा आयोजना गरेको कन्फ्रेन्समा समेत गएनन् । अत्यावश्यक काममा मात्र मन्त्रीहरू विदेश जान नहुने मान्यतामा अडे ।
मन्त्री बनेपछि रमाइलो गरी अभिव्यत्ति दिइरहने महावीर शिक्षा, विज्ञान तथा प्रविधि मन्त्रीको रुपमा शिक्षा क्षेत्रमा आमूल सुधार र दिर्घकालिन परिवर्तन गर्न चहान्थे । त्यसको लागि उनले तीनवटा अध्यादेश र चार नियमावली पारे । तर उनले तयास पारेको तीन अध्यादेश र चार वटा नियमावली स्वीकार राष्ट्रपति र संसद्को विधान समितिले रोकीदियो । उनले बुधबार फेसबुकमा लेखेका छन्, ‘३ वटा अध्यादेश र चार वटा नियमावली ल्याउन सहयोग नभएपछि रिस उठ्यो र म्याग्दीतिर दगुरेँ ।’
शिक्षा क्षेत्रको संरचनागत सुधार बिना देश समृद्ध हुन नसक्ने उनको बुझाई छ । राष्ट्रपति र संसद्को विधान समितिले आफूले प्रस्ताव गरेका तीन अध्यादेश र चार नियमावली स्वीकार गरेको भए आफूमा यो निर्वाचनमा लड्ने मनसाय नै नभएको उनको भनाइ छ । उनले विज्ञान, प्रविधि र नवप्रवर्तनका लागि छुट्टै बलियो मन्त्रालय गठन गर्ने प्रस्ताव पनि अघि सारेको थिए । तर सो प्रस्ताव मुख्य सचिव तहबाट पनि रोकिएको उनको आरोप छ।
अमेरिकामा अध्ययन सकी स्वदेश फर्किएर आफ्नो थातथलो म्याग्दीको नागीमा समुदायका लागि शैक्षिक, प्राविधिक र आयआर्ज सुरु गरे । त्यही बेला सन् २००७ मा एशियाको नोबेल पुरस्कार भनिने रोमन म्यागेसेसेबाट सम्मानित गरिएको थियो। यसपछि मात्र उनले देशव्यापी ख्याति पाएका थिए।
यसको पाँच वर्षपछि उनले राष्ट्रिय आविष्कार केन्द्र स्थापना गरे। केन्द्र मार्फत देशमा अनुसन्धान अनि नवप्रवर्तनका लागि वर्षौं राज्यलाई गुहारे। तर सहयोग नपाएपछि पुस्तक बेचेर वीरगन्ज कृषि औजार कारखाना पुनःस्थापित गर्ने अभियानमा जुटीरहेका बेला उनी मन्त्री भएका थिए ।
शैक्षिक माफियाहरुको जोडबलमा ३ वटा अध्यादेश र चार वटा नियमावली रोकिएको उनको बुझाई छ । शैक्षिक माफियाहरुको जोडबलमा ३ वटा अध्यादेश र चार वटा नियमावली रोकिएपछि शिक्षा क्षेत्रमा आमूल सुधार र दिर्घकालिन परिवर्तनका लागि फेरि पनि सिंहदरबार छिर्ने संकल्प सहित उनी मंगलबार म्यादी पुगेका छन् ।
Discussion about this post