इटहरीः सुनसरीका दुई फरक फरक स्थानबाट प्रहरीले अवैध औषधिसहित ३ जनालाई पक्राउ गरेको छ । पक्राउ पर्नेहरुमा सुनसरीको बराहक्षेत्र नगरपालिका– ८ सालवन्दी–२ का २१ वर्षीय अर्जुन कार्की , सालबन्दी–६ मुनाल चोकका युगल श्रेष्ठ र सुनसरी धरान ‍१५ मिलन चोकका–१९ वर्षीय अमन गुरुङ रहेको १ नम्बर प्रदेश प्रहरी कार्यालय विराटनगरले जनाएको छ ।

कार्की र श्रेष्ठलाई बुधबार प्रहरी चौकी प्रकाशपुरबाट खटिएको प्रहरी टोलीले सालबन्दी भित्री सडकखण्डमा दक्षिणबाट उत्तर तर्फ आँउदै गरेको प्र १–०२ ००३ ह ३६३७ नम्बरको अटो जाँच गर्ने क्रममा उक्त अटोमा लुकाई ल्याउँदै गरेको ट्रामाडोल १७८० क्याप्सुल र स्पास्मोप्रोक्सिभोन १६ क्याप्सुल सहित पक्राउ गरेको हो भने अस्थार्यी प्रहरी पोष्ट श्यामचोकबाट खटिएको प्रहरी टोलीले गुरुङलाई ३,४०० ट्याव्लेट ट्रामाडोल र ३,४०० ट्याव्लेट स्पास्पेनसहित नियन्त्रणमा लिएको हो । पक्राउ परेका तिनै जनाको सम्बन्धमा विस्तृत अनुसन्धान भइरहेको प्रहरीले जनाएको छ ।