इटहरी । गत भदौ २३ र २४ गते भएको जेनजी आन्दोलनमा तोडफोड र आगजनी गरी क्षतिग्रस्त बनाइएका इलाका प्रहरी कार्यालय इटहरीका दर्जन बढी सवारी साधनहरूको उचित व्यवस्थापन गरिएको छ। शुक्रबार इटहरी उपमहानगरपालिका वडा नं. ६ को पहल र इलाका प्रहरी कार्यालय इटहरी तथा यातायात व्यवसायीहरूको सक्रियतामा जलेर अलपत्र परेका दर्जन बढी सवारी साधनहरूको उचित व्यवस्थापन गरिएको हो।
जलेर अलपत्र अवस्थामा सडक किनारामा रहेका सवारी साधनका कारण शहरको सौन्दर्यमा प्रभाव पर्नुका साथै ४ लेन सडक निर्माणमा पनि बाधा पुगेकोले सबैको सुझाव र सहयोगमा यसलाई व्यवस्थापन गरिएको इटहरी उपमहानगरपालिका वडा नं. ६ का वडाध्यक्ष दिवस पोखरेलले बताए।
शुक्रबार बिहान प्रहरी कार्यालय परिसरमा जलेर नष्ट भएका सवारी साधनहरू इटहरी–९ को रंगशालास्थित पायक पर्ने स्थानमा व्यवस्थापन गरिएको वडाध्यक्ष पोखरेलले बताए। गत भदौ २३ र २४ गते देशभर जेनजी आन्दोलन उग्र बन्दा इटहरी उपमहानगरले सबैभन्दा बढी क्षति र नोक्सानी बेहोर्नुपरेको थियो। जसमा उपमहानगरको सिङ्गो कार्यालय, २ दर्जन भन्दा बढी सवारी साधनमा आगजनी र तोडफोड भएको थियो भने इलाका प्रहरी कार्यालय इटहरीको कार्यालयसँगै प्रहरीले प्रयोग गर्ने आधा दर्जनभन्दा बढी सवारी साधनहरू आगजनीपछि नष्ट भएका थिए। हाल प्रहरी कार्यालय इटहरी–९ स्थित रंगशाला परिसरमा सारेर सेवा सुचारु गरिएको छ।
यता, जलेर नष्ट भएको प्रहरी कार्यालयको केही भाग पुनःनिर्माण गरी वडा प्रहरी कार्यालय स्थापना गर्ने पहल सुरु भएको वडा नं. ६ का वडाध्यक्ष दिवस पोखरेलले बताए। यसो गर्दा मुख्य बजार क्षेत्रको शान्ति–सुरक्षा कायम रहने उनले बताए।
Discussion about this post