इटहरी डेस्क । नेकपा एमाले निकट विद्यार्थी संगठन अनेरास्ववियुका अध्यक्ष डा सुजन कडरियालाई नेता स्वीकार नगर्ने सो संगठनका जिल्ला अध्यक्ष तथा इन्चार्जहरूले चेतावनी दिएका छन् ।संकटको बेला भाग्ने व्यक्तिलाई नेतृत्वको रूपमा मान्दैनौँ भन्दै बागमती प्रदेशका इन्चार्ज र अध्यक्षहरूले हस्ताक्षर सहितको ध्यानाकर्षण पत्र सार्वजनिक गरेका हुन् ।
कडरियाले जेनजी आन्दोलनको समयमा सामाजिक सञ्जालमार्फत पदबाट राजीनामा दिएको घोषणा गरेका थिए । तर पछि सामाजिक सञ्जालमार्फत नै अध्यक्ष पदबाट दिएको राजीनामा फिर्ता गरेको बताएका थिए ।कडरिया पुनः अध्यक्ष पदमा फर्किन खोज्दा सङ्गठनभित्र विवाद उत्पन्न भएको हो ।
बागमती प्रदेशका ६ जिल्ला अध्यक्ष र सम्बन्धित जिल्लाका इन्चार्जहरूले सार्वजनिक गरेको उक्त पत्रमा आन्दोलनको समयमा भाग्ने र आन्दोलन शान्त भएपछि अध्यक्ष पदमा फर्किन खोज्ने कदम सङ्गठनको नियम र प्रक्रियागत नभएको उल्लेख गर्दै अध्यक्ष कडरियाको पछिल्लो रवैया, आचरण र राजीनामासम्बन्धी कार्यले सङ्गठनको इज्जत र भविष्यसँग मेल नखाने कुरा स्पष्ट पारिएको छ।
सङ्कटको घडीमा नेतृत्वले सङ्गठनलाई बलियो बनाउनुपर्ने भए पनि भाग्ने, राजीनामाको नाटक गर्ने, मौन बस्ने र व्यक्तिगत रूपमा निराशावादी सन्देश प्रवाह गर्ने प्रवृत्तिले सङ्गठनलाई कमजोर बनाएको पत्रमा औँल्याइएको छ।
साथै, पत्रमा महाधिवेशनमार्फत प्राप्त प्रतिनिधिको मतको अपमान हुने, विद्यार्थी आन्दोलनमा बलिदान भएका शहीदहरूको योगदानलाई अवमूल्यन गर्ने र सङ्गठनलाई सङ्कटमा पार्ने नेतृत्व अस्वीकार्य भएको स्पष्ट पारिएको छ।बागमती प्रदेशका हस्ताक्षरकर्ताहरूले तत्काल बैठक बसेर सङ्गठनलाई नयाँ, जिम्मेवार नेतृत्वको हातमा सुम्पियोस् भन्ने माग गरेका छन् ।
Discussion about this post