इटहरी ।  राजवंशी समाज उत्थान समिति (विराट)ले आदिवासी जनजातिमा सूचीकरणको माग गर्दै आन्दोलनको घोषणा गरेको छ। बिहीबार विराटनगरमा पत्रकार सम्मेलनको आयोजना गरी समाजले विराट राजवंशीलाई आदिवासी जनजाति उत्थान राष्ट्रिय प्रतिष्ठानमा छुट्टै सूचीकृत गर्नुपर्ने मुख्य माग राखेर आन्दोलन गर्ने चेतावनी सहितको कार्यक्रम घोषणा गरेको हो। उनीहरूले राज्यको हरेक अङ्गमा विराट राजवंशीको स्थान सुनिश्चित गर्नु पर्ने समेत माग गरेका छन्।

राजवंशी समाज उत्थान समिति (विराट) केन्द्रीय अध्यक्ष भुवनेश्वर मण्डल राजवंशीले फागुन ६ गते विराटनगरमा वृहत् भेला तथा र्‍याली गर्नुका साथै  माग पुरा नभए २०८२ वैशाख देखि अनशन, सिटी जुलुस, चक्का जाम गर्ने चेतावनी दिए।आदिवासी विराट राजवंशीलाई समानुपातिक रूपमा प्रतिनिधित्वको सुनिश्चित गर्नु पर्ने, विराटनगरको प्रथम जातिको रूपमा विराट राजवंशीलाई घोषणा गर्नुपर्ने, विराट राजवंशी जातिको उत्थानका लागि प्रत्येक तह र अङ्गहरूमा छुट्टै आरक्षणको व्यवस्था गर्नु पर्ने समेत उनीहरूको माग छ।

पत्रकार सम्मेलनमा उनले विराट राजवंशी जातिको प्रमुख बसोबास भएको विराटनगर महानगरपालिका, कटहरी, जहदा, बुढीगंगा र ग्रामथान गाउँपालिका क्षेत्रलाई विराट राजवंशी स्वायत्त परिषद्को व्यवस्थाको पनि माग गरे।विराट राजवंशीका यी मागलाई राज्यसामु  पुर्‍याउन  फागुन ३ गते मोटरसाइकल र्‍याली र ६ गते १८ औ बृहत् भेला महेन्द्र चौक विराटनगरमा गर्न लागिएको राजवंशीको भनाई छ। विराट राजवंशी समुदायको पहिचान झल्काउने पहिरन, संस्कृति झल्काउने गरगहना लगाएर आन्दोलनका कार्यक्रममा सहभागी हुन उर्दी जारी गरिएको छ।