इटहरी । सुनसरीको धरान उपमहानगरपालिका–१३ की ३७ वर्षीया एकल महिला उषा राईको हत्या प्रकरणका बारेमा मानव अधिकारकर्मीले चासो देखाएका छन् । धरानमा सिलाइकटाइ गर्दै आफ्ना दुई छोरीको शिक्षादीक्षा र डेराघरको भाडा तिर्दै बस्नुभएकी राईको हत्याको विषयमा अधिकारकर्मीले चासो देखाएका हुन् ।

पतिको निधनले पतिवियोगमा रहनुभएकी उषाले आफ्ना दुई छोरी (जेठी स्मृति राई बीबीएस तेस्रो वर्ष र कान्छी छोरी कक्षा ३ मा) पढाउँदै आफ्नै धार्मिक पथ टोलमा डेराघर बस्दै आउनुभएको ठाउँमा अधिकारकर्मीले स्थलगत अनुगमन गरेका हुन् । अनुगमनका क्रममा राईको डेराघरभन्दा तीन समय मिटर पश्चिमकी ५५ वर्षीया उर्मिला राईको समूहले कात्तिक ३ गते आफ्नै श्रीमान् गोविन्द राईलाई फकाएर सम्बन्ध राखेको आरोप लगाई कथित आमा समूहका नाममा आक्रमण गरेको अनुगमनका क्रममा जानकारी पाएको अधिकारकर्मी शान्ति दनुवारले जानकारी दिनुभयो ।

धरान–१३ को खोला किनारको भाडाको घरमा बस्दै आउनुभएकी उषाले सिलाइकटाइको पसल खोल्नुभएको पाँच महिना भएको र उहाँ त्यहीँ बस्नुभएको थियो । त्यस क्रममा उर्मिला राईलाई उहाँको घरमा पतिसँग झैझगडा भइरहेकोमा एकल महिला उषालाई उहाँले आफ्नो पतिलाई फकाएर अनैतिक सम्बन्ध राखेको आरोप लगाएर एक दर्जनभन्दा बढी महिलासहित कात्तिक ३ गते आमा समूहको नामबाट आक्रमणसहित एसिड खुवाउने र फोहोर कोच्याउने काम गरेको आरोपसमेत लगाइएको छ ।

त्यसपछि बेहोश भएकी उषाको बीपी कोइराला स्वास्थ्य विज्ञान प्रतिष्ठान धरानमा उपचार हुँदै थियो । उपचारकै क्रममा मङ्सिर १३ गते उहाँको मृत्यु भएकाले हत्या गरेको आरोपमा पीडितका भाइ २६ वर्षीय सुन्दर राईले इलाका प्रहरी कार्यालय धरानमा किटानी जाहेरी दिनुभएको थियो ।घटना गम्भीर भएकाले त्यसको पूर्ण छानबिन गरी दोषीलाई कानुनबमोजिम कारबाही गर्नुपर्ने र दण्डहीनता अन्त्य गर्नुपर्ने भन्दै मानवअधिकारकर्मीले चासो देखाएका हुन् ।

अनौपचारिक क्षेत्र सेवा केन्द्र इन्सेक प्रदेश १ प्रमुख सोमराज थापा र सुनसरी जिल्लाका प्रतिनिधिसहितले घटनाका बारेमा जानकारी लिनुभएको छ । उता ओरेक प्रदेश १ र सुनसरी कार्यालयले समेत मानवअधिकारकर्मी र सञ्चारकर्मीसहितको सहभागितामा स्थलगत अनुगमन गर्दै घटनाका बारेमा चासो देखाइएको छ । ओरेक नेपालका प्रदेश संयोजक शान्ति दनुवारसहितको टोलीले घटनाबाट ज्यान गुमाउनुभएकी उषाका बुवा, आमा, दिदी र छोरीहरूसहित मुख्य आरोपित भनिएका धरान–१३, सूर्यमार्गकी उर्मिला राईको घरमा समेत गई जानकारी लिएको छ । आजकाे गाेरखापत्र दैनिकमा खबर छ ।