एयर इन्डिया दुर्घटना : फ्लाइट छुटेर बाँचेकी भूमि

 काठमाडौं । गुजरात अंकलेश्वरकी भूमि चौहान बिहीबार दुर्घटनामा परेको एयर इन्डियाकै विमानबाट लन्डन जाने तयारीमा थिइन् ।घरबाट सडकमार्ग हुँदै विमानस्थलतर्फ लागेकी भूमि ट्राफिक जामका कारण समयमा एयरपोर्ट पुग्न सकिनन् । फ्लाइट छुट्दा उनी निकै दु:खी थिइन् ।

तर, उडेको क्षणभरमै उनी चढ्न नपाएको विमान दुर्घटनामा भयो । दुर्घटनामा जहाजका २४२ यात्रुमध्ये एकजना बाहेक सबैको ज्यान गयो । उनी अहिले विमान छुटेकोमा आभारी छिन् ।‘ट्राफिक जामका कारण म समयमा अहमदाबाद एयरपोर्ट पुग्न सकिनँ । पाँच मिनेट ढिलो पुगेकाले मलाई विमानस्थल प्रवेश गर्न दिइएन,’ बीबीसी हिन्दीसँग कुरा गर्दै भूमिले भनिन् ।

टिकटको पैसा खेर गएको र जागिर पनि जानसक्ने डरले उनलाई पिरोलेको थियो । ‘अब म आभारी छु, मेरो पैसा त गयो तर, ज्यान बँच्यो,’ उनले भनिन् ।भूमि पढाइका लागि केही वर्षअघि बेलायत गएकी थिइन् । दुई वर्षअघि उनको केवल चौहान नामका युवासँग विवाह भयो । केवल बेलायतको ब्रिस्टल शहरस्थित एक बैंकमा कार्यरत छन् ।

‘म बेलायतमा पढ्न गएकी थिएँ, त्यहाँ पार्ट टाइम जागिर पनि गर्थें । विवाह भएको दुई वर्षपछि म घर आएको थिएँ, डेढ महिनाको बिदा सकेर फेरि बेलायत फर्किन लागेको थिएँ,’ उनले भनिन् ।

भूमि गुजरातकै भारुच जिल्लाको अंकलेश्वर निवासी हुन् । उनले अनलाइनबाटै फ्लाइट चेक(इन गरेकी थिइन् । तर ढिला पुग्दा उनलाई बोर्डिङ पास दिइएन ।विमानस्थलमा एयर इन्डियाका कर्मचारीले उनलाई ‘तपाईं ढिलो आइपुग्नु भो’ भनेर फर्काइदिए । उनी पुगिन्जेलसम्म अध्यागमनको काम सकिएर अन्य यात्रुले बोर्डिङ पास लिइसकेका थिए ।

‘त्यसैले म फ्लाइटमा चढ्न पाइनँ । मैले कर्मचारीहरूसँग बेलायत जान नपाए आफू जागिरबाट निकालिने बताएँ । मेरो टिकटको पैसा पनि खेर जान्छ भनें, तर उनीहरूले मेरो कुरा सुनेनन्,’ भूमि भन्छिन् । फ्लाइट छुटेर टिकटको पैसा फिर्ता माग्दा पनि नपाएकोमा उनलाई दुःख लागेको थियो ।त्यसपछि विमानस्थलबाट बाहिरिएर घर फर्किने क्रममा चिया पिउँदै गर्दा उनले सो फ्लाइट टेकअफ लगत्तै दुर्घटनामा परेको थाहा पाइन् ।

‘म चिया पिउँदै थिएँ र ट्राभल एजेन्टसँग रिफन्डका लागि कुरा गर्दै थिएँ । त्यसैबीच अंकलेश्वरबाट फोन आयो र म चढ्न नपाएको फ्लाइट दुर्घटनाग्रस्त भएको खबर पाएँ,’ उनले स्तब्ध भावमा बताइन् ।म तत्कालै मन्दिर गएँ र भगवानप्रति आभार व्यक्त गरें, अहमदाबादको ट्राफिक जामले मेरो ज्यान बँच्यो,’ उनले भनिन् ।लन्डन जाँदै गरेको एयर इन्डियाको बोइङ ७८७–८ विमानमा १६९ भारतीय, ५३ बेलायती, ७ पोर्चुगिज र एक क्यानडेली नागरिक सवार थिए । गुजरातका पूर्वमुख्यमन्त्री विजय रुपाणी पनि विमानमै सवार थिए ।

विमान दुर्घटनाको कारण खुलेको छैन । विमानमा सवार २४२ मध्ये २४१ जनाको मृत्यु भएको छ । विमानस्थल नजिकैको डाक्टरहरू बस्ने भवनमा ठोक्किएकाले यात्रुसहित जमिनका मान्छेहरू पनि हताहती भएको आशंका छ । त्यसैले अझै क्षतिको यकिन विवरण आएको छैन ।

अहदाबादका एक वरिष्ठ स्वास्थ अधिकारीले विमानका यात्रुबाहेक दुर्घटनामा जमिनका ८ जनाको पनि मृत्यु भएको बताएको संवाददाता विकास पाण्डेलाई मेन्सन गर्दै बीबीसी हिन्दीले रिपोर्टमा लेखेको छ ।

प्रहरीका अनुसार दुर्घटनाग्रस्त विमानमा सवार २४२ जनामध्ये भारतीय मुलका बेलायती नागरिक विश्वास कुमार रमेश मात्रै जीवित छन् ।

विश्वासले भारतीय सञ्चारमाध्यमहरूसँग कुराकानीमा भनेका छन्, ‘टेकअफको ३० सेकेन्डभित्रै ठूलो आवाज आयो र विमान दुर्घटना भयो, यो सबै एकदमै छिटो भयो ।’