•  ९ आश्विन २०७९, आईतवार
  •  1:26:56 AM

पहाडी जिल्लामा खटिने चिकित्सकलाई प्रोत्साहन भत्ता : ६० हजारदेखि १ लाख ५० हजार रुपैयाँसम्मा दिइने

- भाद्र २७, २०७९ मा प्रकाशित


Share This..

इटहरी । प्रदेश सरकारले पहाडी जिल्लाका अस्पतालहरूमा कार्य गर्ने चिकित्सकहरुलाई आकर्षक सुविधासहित प्रोत्साहन गर्ने निर्णय गरेको छ । चिकित्सकलाई प्रोत्साहित गर्न सरकारले ‘विज्ञेषज्ञ चिकित्सक प्रोत्साहन भत्ता सम्बन्धी कार्यविधि २०७९’ बनाएर कार्यान्वयनमा ल्याएको छ ।

दुर्गम तथा पहाडी जिल्लाका अस्पतालहरुमा विशेषज्ञ चिकित्सकहरुको अभाव रहेको र त्यहाँ जान नमान्ने प्रवृत्तिमा कमी ल्याउन प्रदेश सरकारले मासिक १ लाख ५० हजार रुपैयाँसम्म प्रोत्साहन भत्ता दिने गरी नयाँ कार्यविधि बनाएको हो ।

प्रदेशका १ पहाडी जिल्लाका अस्पतालहरूमा चिकित्सकहरूको चरम अभाव छ । चिकित्सकहरू सहर केन्द्रित हुँदा दुर्गमका अस्पताल भने विशेषज्ञ डाक्टरको अभावबाट गुज्रिरहेका छन् । प्रदेश सरकारले कार्यविधि कार्यान्वयन भएसँगै चालु वर्षबाटै प्रदेश १ को ११ वटा पहाडी जिल्लामा काम गर्ने चिकित्सकहरुले प्रोत्साहन भत्ता पाउने स्वास्थ्य मन्त्री जयराम यादवले बताए ।

सहरका अस्पताल मात्र सुधार गरेर स्वास्थ्य सेवा सुधार नहुने भन्दै गाउँका अस्पताललाई पनि सुधार गर्नुपर्ने आवश्यकतालाई महसुस गर्दै सरकारले विशेष निर्णय गरेको उनले बताए ।

स्वास्थ्य मन्त्रालयले पहाड तथा दुर्गम जाने चिकित्सकलाई मासिक ६० हजारदेखि १ लाख ५० हजार रुपैयाँसम्म प्रोत्साहन भत्ता दिने गरी कार्यविधि बनाएको हो । संखुवासभा, सोलुखुम्बु, ओखलढुंङ्गा, खोटाङ्ग, भोजपुर, ताप्लेजुङ्ग, तेह्रथुम र पाँचथर जिल्ला अस्पतालहरूमा काम गर्ने चिकित्सकलाई समान प्रोत्साहन भत्ता दिने कार्यविधिमा उल्लेख छ । उक्त अस्पतालमा काम गर्ने ११ औं तहको चिकित्सकलाई मासिक १ लाख ५० हजार, ९ र १० औं तहका चिकित्सकलाई १ लाख ३५ हजार र ८ औं तहको चिकित्सकलाई १ लाख २० हजार रुपैयाँ दिइने छ ।

यस्तै धनकुटा, उदयपुर र इलाम जिल्ला अस्पतालमा खटिने चिकित्सकको प्रोत्सान भत्ता सरकारले घटाएको छ । ती जिल्लाका अस्पतालमा खटिने ११ औं तहको चिकित्सकलाई ७५ हजार, ९ र १० औं तहका चिकित्सकलाई ६८ हजार र ८ औं तहको चिकित्सकलाई ६० हजार रुपैयाँ मासिक प्रोत्साहन भत्ता पाउनेछन् । स्थायी चिकित्सकको हकमा ६० देखि १ लाख ५० हजार रुपैयाँसम्म प्रोत्साहन भत्ता दिने सरकारले निर्णय गरेको छ ।


छात्रवृत्ति करारमा आएका चिकित्सकको हकमा भने प्रदेश सरकारले प्रोत्साहन भत्ता घटाएको छ । संखुवासभा, सोलुखुम्बु, ओखलढुङ्ग, खोटाङ्ग, भोजपुर, ताप्लेजुङ्ग, तेह्रथुम र पाँचथर जिल्ला अस्पतालहरुमा खटिने छात्रवृत्ति करारमा आएका ११ औं तहका चिकित्सकले मासिक ७५ हजार रुपैयाँ पाउनेछन् भने ९ र १० औं तहका चिकित्सकले ६८ हजार रुपैयाँ प्रोत्साहन भत्ता पाउनेछन् । धनकुटा, उदयपुर र इलाममा खटिने करार छात्रवृत्तिमा आउने ११ औं तहका चिकित्सकले ३८ हजार र ९ र १० औं तहका चिकित्सकले ३४ हजार रुपैयाँ मात्र प्रोत्सान भत्ता पाउनेछन् ।

३० दिन काम गरेका चिकित्सकले सतप्रतिशत भत्ता पाउने

सरकारले महिनामा ३० दिन काम गर्ने चिकित्सकलाई शतप्रतिशत भत्ता दिने र १५ दिनभन्दा कम काम गरेमा त्यस्तो भत्ता नपाउने व्यवस्था गरेको छ ।अस्पतालमा महिनामा तीन दिनभन्दा कम काम गरेको पाइएमा प्रतिदिन ३.५ प्रतिशतका दरले रकम कट्टा गरेर भुक्तानी दिने कार्यविधिमा उल्लेख छ ।प्रदेश सरकारले दिने प्रोत्साहन भत्ता विशेषज्ञ चिकित्सक कार्यरत रहेको अस्पतालबाटै उपलब्ध गराउने व्यवस्था मिलाएको स्वास्थ्य मन्त्रालयले जनाएको छ ।

तराइको सुनसरी, मोरङ र झापा जिल्लाका प्रदेश सरकार मातहतका अस्पतालहरूले उक्त प्रोत्सान भत्ता पाउँदैनन् । प्रदेश १ मा प्रदेश सरकार मातहतका कोशी कोभिड अस्पतालसहित १५ वटा अस्पताल रहेका छन् । ती अस्पतालमा ५६ जना विशेषज्ञ चिकित्सकको दरबन्दी रहेको छ । पहाडी जिल्लाहरूमा दरबन्दी अनुसारको विशेषज्ञ चिकित्सक नजाने गरेकै कारणले सरकारले प्रोत्साहन भत्ता सम्बन्धी कार्यविधि कार्यान्वयनमा ल्याएको हो ।

Comments

सम्बन्धित खवर