इटहरी । राष्ट्रिय परीक्षा बोर्डले भदौ मध्यमा कक्षा १२ को नतिजा सार्वजनिक गर्ने भएको छ । बोर्डका अध्यक्ष महाश्रम शर्माले भदौ १५ गतेभित्र परीक्षाफल सार्वजनिक गर्ने तयारी भइरहेको बताएका छन् ।

अध्यक्ष शर्माले भने, ‘योजना भित्रै नतिजा निकाल्न सकिन्छ भनिरहनुभएको छ साथीहरुले । अब १५ गतेभित्र नतिजा सार्वजनिक हुन्छ ।’ परीक्षा नियन्त्रण कार्यलय (कक्षा १२) ले नतिजा तयारीको लगभग अन्तिम चरणमा पुगेको जानकारी दिएको उनको भनाइ छ ।

कार्यालयले यसपटक लेटर ग्रेडिङ निर्देशिका, २०७८ अनुसार नतिजा सार्वजनिक गर्नेछ । जस अनुसार प्रयोगात्मक परीक्षामा न्यूनतम ४० अंक ल्याउनुपर्नेछ र सैद्धान्तिकतर्फ कुनै पनि विषयमा न्यूनतम ३५ अङक ल्याउनुपर्नेछ । 

तोकिएको अङक भन्दा कम अंक ल्याएमा एनजी (नन ग्रेडेड) लेखिनेछ । एनजी लेखिएका प्रमाणपत्रले माथिल्लो कक्षा पढ्न नपाउने व्यवस्था गरिएको छ ।गत जेठ १६ गतेदेखि २५ गतेसम्म सञ्चालन गरेको परीक्षामा ४ लाख बढी परीक्षार्थी सहभागी भएको बोर्डले जनाएको छ ।